八月交響曲--聲夢奇緣

好微妙的一套戲。

本來以為唔會喺香港上正場，多得Ben話我知香港1月3日會上正場，我覺得幾好睇的一套電影。一直以為如果會的話中文片名一定係最頹的「八月狂想曲」、「八月交響曲」之類，但其實八月喺戲中唔係指月份(開頭我以為係音樂節既名之類)，所以如果真係譯做是但一個名未免同套戲太無關。雖然聲夢奇緣我覺得佢太童話太Enchanted魔法奇緣(剛剛見到台灣譯名係曼哈頓奇緣...Orz...真係哈哈哈....簡直同Maid In Manhatten(港譯五星級戀人)既女傭變鳳凰有得揮)，套戲又的確有聲有夢有奇緣，所以也還不錯啦(不過都係覺得有D求其...硬係覺得「奇緣」係諗唔到點收科先會出動既百搭字，例如Big Fish大魚奇緣，花樣奇緣...食Cinderella仙履奇緣音的 Heartbreakers「千」你奇緣倒是很可愛的譯名)。

故事講11歲的弧兒Evan，自細有著非一般音樂觸覺，佢深信自己聽到的來自從未見面既父母，只要跟隨音樂，總有同父母相聚既一日...說的除了尋親之旅遇上的種種、音樂作為溝通的橋樑，我覺得仲帶出左人與人之間微妙的感應，幾個角色喺種種巧合下交會，當Evan喺公園表現有人比錢佢，一抬頭見到原來係Louis而佢兩個都唔知對方係自己邊個時真係好surprised。故事簡單但好吸引人睇落去，節奏有D慢但係唔悶，個故仔好似係一束絲向四方八面散開，而最後收歸一點，感覺好完滿。

戲入面有好多場戲都係講Evan從生活中一切平凡聲音入面聽到音樂，好有節奏感既剪接，將好普通既「噪音」融入樂曲，令我好有印象，而開頭一場影住佢喺一片田野度聽住風聲撩動草叢，拍得好靚好有氣勢! 完場roll credits時見到戲入面既歌真係由演員唱/演奏返，Jonathan Rhys Meyers演一個樂隊主音，都唱得兩嘴，點解好似所以荷里活既演員都係唱得又演得既?最估唔到係Keri Russell，一路以為戲入面佢拉大提琴係做個樣，睇credits見到原來真係佢拉架!!!!好勁~!!!之後係imdb睇返原來幾個主角都有為套戲去學樂器，雖然唔係所有歌都係佢地演奏，不過已經好勁~!!!因為自己不嬲無音樂細胞，真係覺得識樂器既人好叻。D歌都幾好聽，不過就唔係好有印象，可能係唔夠catchy，對比Hairspray同Enchated 既歌係上哂腦，August Rush就爭D，有D輸蝕，不過我都有睇哂roller聽哂D歌先走~

Keri Russell係一個我好喜愛既演員，香港人比較熟悉佢既作品應該係Mission:Impossible III，但其實開始認識佢係由Felicity青春無罪開始，係一套講大學生活既TV series，當年喺美國都幾hit下，點知season 2一開頭講佢失戀剪短左頭髮，D ratings就跌左好多，我係之後睇返報導同forum先知，都唔係太清楚，總之D人怪佢個新髮型拖累個收視...咁都得，我諗佢當時個頭就好似Friends既Rachel cut一樣咁多人講...Felicity之後，Keri既近作有好評獨立(?)作Waitress，仲有就係由Felicity creator J.J Abrams執導既MI 3，喺August Rush入面都做得好唔錯，前途一片光明。有好幾場交代佢感應到/get到D 野既戲都表達得好好，我唔知個D係演技定係個剪接剪得好，不過因為套戲其中想講既係用音樂溝通，好多野如果要用對白交代就有違原意，所以好多時都要演員用表情表達，唔駛開口已經明哂，imdb有網友覺得好唔make sense，「又會唔講都明都get到既」的樣子，咁人地就係想講無聲勝有聲嘛...好鍾意最尾個場，開頭諗重逢個下點搞呢?解釋一餐好掃興架wor...而原來最後，甚麼都不用說，一切在心中。Robin Williams做得好，個角色好成功咁令我覺得佢好''黑''人憎...

小演員Freddie Highmore好可愛，都做得好好，係戲入面都OK喊包...唔係係又喊唔係又喊大喊十個種，係堅強得黎眼角滲淚...嘩...好犀利...佢都有為套戲去學樂器...好叻，人仔細細(yee?原來都15歲啦...係娛樂圈算大人了....XD)又有演技又拍過好多大片，佢就係Charlie and the Chocolate Factory既Charlie，Finding Neverland又有佢份，仲要我睇August Rush之前睇The Golden Compass(係back to back咁睇!好滿足~!)完credits有配音片單，主角身邊既動物係佢配既(另外仲有Kathy Bates!不過我聽唔出佢配邊個...)，當時未睇August Rush，淨係睇trailer時見到佢個名覺得好熟，到入場先知原來就係佢，仲要同場有(又係小說adapt既)The Spiderwick Chronicles trailer，又有佢....簡直係男版Dakota Fanning...

其實Jonathan Rhys Meyers都做得唔錯的，又唱得好聽，不過唔夠Freddie Highmore令人驚喜...
講起驚喜，竟然有Ugly Betty ''俏''Betty既Amanda(Becki Newton)客串...一見到就諗起Amanda...雖然佢好認真不過都係覺得佢好搞笑...總括黎講係好lovely好微妙好緊密既一套戲，like it a lot，推薦~!!!

期待再期待

Indiana Jones and the Raiders of the Lost Ark (1981) 奪寶奇兵 Indiana Jones and the Temple of Doom (1984)魔域奇兵
Indiana Jones and the Last Crusade (1989) 聖戰奇兵 Indiana Jones and the Kingdom of the Crystal Skull(2008)~!!!!!!!!!!!!
超級期待~!!!!!!!!!!!!!!!!!!!!!!!!!!!!!!!!!!!!!!本來想寫Enchanted的，不過見Indiana Jones已經有poster，忍唔住要post一下，唔知今次會係乜乜奇兵呢? IMDB暫時未有故事大鋼，不過之前睇Premiere，有個可能既故仔，好似話世界上真係有7個crystal skull，相傳擁有神秘力量，有部份係博物館(而且無證據顯示佢地有任何力量)，有一個(定兩個)下落至今不明，Indiana既第四次歷歷應該就係環繞住失落crystal skull既過程...等足19年既第四集，萬分期待~!!!!!!!

填充

想起你心還是會不期然的__ __

那兩個字是甚麼，我也不清楚，又不exactly是窩心，又不是溫暖，又不是痛楚
只是突然的感覺到心臟的存在
跳了一下
那是不是悸動﹖

傳說見到喜歡的人就會心跳加速
我不肯定與愛人見面是不是就會令你的心起跑
只知道想起你我會心跳腦海中實實在在浮現出一個心臟在暗紅色空間中收縮又放開了一下
聽上去很恐怖片，實情是愛情喜劇的畫面

也許世上只有你會令我這樣心跳
也許不
但遇上下一個叫我心跳的人之前
是一場漫長的等待

你就是答案
我如此肯定
可惜這不是選擇題
我不可以選想要的答案
非黑即白的是非題
你說不的話
我可以怎樣

對不對

The only thing better than Hairspray, that's...

Once upon a time, in a kingdom far far away...

喺好耐好耐之前，喺一個好遠好遠既地方，住左一個好美麗善良既女仔芝莎，有一日佢遇到白馬王子愛德華，雙雙墜入愛河，正當佢地準備分享真愛一吻，從此幸福快樂咁生活落去之際，奸險既皇后出手阻撓，將芝莎送左去一個童話已死既地方--唔係好耐之前又唔係好遠既New York City!人生路不熟既芝莎得到迷人大狀羅拔幫忙，喺現實世界開始一段魔幻奇緣之時，愛德華亦勇闖NYC拯救佢既愛人，但係皇后係唔會輕易擺休，千方百計阻止芝莎重返童話世界...究竟童話可唔可以唔比現實磨食，芝莎又可唔可以一如所有迪士尼公主，搵到自己既Happily Ever After 呢???

幾經辛苦兜兜轉轉，終於睇左Enchanted，好好好好好好睇!!!!!
Simply Enchanting!!!!!!不枉我等左咁耐，搵戲院搵左咁耐，唔知點解Montreal得D偏遠戲院有得做，正當我一路擔心佢個票房，一路Google Map，一路盤算邊間戲院係喺20公里內之際，Montreal電影網忽然顯示市中心有一間戲院有得上Enchanted!!!!!!!雖然學生飛都貴過香港正場(之前聖誕睇翻生侏儸館都係六十幾之嘛...今次為返港幣八十幾)，我好耐無比過正價睇戲，不過Enchanted係絕對worth every penny!!!!!!!係好好好好好睇，睇得好開心，好感動，佢開始時我係興奮到震，頭10分鐘既2D動畫，好靚，好有立體感，線條流麗畫功細膩，帶觀眾返返去2D Classic Disney Fairy Tales既世界，動畫部份比我想像中好睇，因為之前覺得D公仔唔夠靚，但當佢唔係一幅幅圖而係動畫就唔係咁講，Giselle郁得好自然好靚好靚，同埋唔知係咪用左Tarzan既境深(??)技術，真係好有立體感，而D人物樣貌我覺得有D似Tarzan(Edward)同大力士既女主角(Giselle)...見返2D Disney真係好感動...我諗我一路睇個口都開心/震撼到合唔埋，好開心，好好睇，其實齋睇動畫係無其他Disney Classic咁好睇，不過成套戲就真係好好好好睇!!!頭10分鐘我一路係笑住睇，唔係因為笑位，係好高興好感激，笑到牙骹都痛埋...好鍾意佢一開始就回歸迪士尼最根本，用(Spoiler，請反白)故事書黎開始故事，仲係POP UP既故事書，好靚，目不暇給!

演員方面，個個都做得好好，Amy Adams真係超可愛勁Charming，公主上身一樣，我一路睇，無諗過佢「演技好好」或者「應該提名奧斯卡」，因為我完全唔覺得佢係做緊戲，佢根本就係Giselle!!!我第一次睇Trailer時覺得佢有D作狀，但後來睇Clips就覺得佢做得好好，睇完套戲就明白點解D影評讚佢讚得咁犀利，可愛天真自然，佢真係好似係由個童話度走出黎咁，好神奇，好magical。我唔係好識睇一個人識唔識做戲，但佢真係好convincing，一個真人扮童話人物黎左現實世界變左真人，直情拍得住Felicity Hoffman喺TransAmerica度女人扮男人扮女人咁高難度，鼓掌鼓掌!!!同埋佢唱得好好，youtube 有段片係將True Love's Kiss配落Cinderella Snow White同 Sleeping Beauty既片段，佢把聲真係好似3個公主既混合體，好「彷彿是銀鈴般悅耳」，佢真係完全明白迪士尼公主係怎麼一回事。

Spoiler 請反白: 佢發現自己識得嬲個場又係做得好好，好複雜但係佢handle度，係童話同現實之間拿X得好好，名副其實又喊又笑，好impressive。王子James Marsden好可愛，好好笑，好靚仔，好王子，有好多好精警既對白，同埋佢係unbelievably咁大方...好偉大，係成套戲佢做得最noble既一件事。而hot hot hot律師Patrick Dempsey我無睇過佢其他作品，但係我覺得佢做得幾好，有個位我覺得好感人，就係當佢同Giselle跳舞，一路都頂唔順Giselle無啦啦唱歌既佢喺佢耳仔邊輕輕唱，好溫柔，好怕羞，睇到我眼濕濕。皇后Susan Sarandon其實唔係好多戲份，奸得黎又有D幽默，唔錯唔錯。

故仔黎講，其實我覺得佢係打破左一D童話，同時又重整緊童話...好似Giselle同Robert，我無諗過佢發現自己鍾意左Robert時係咁難以置信，好似真係童話破滅咁，原來公主係可以唔同王子一齊，係可以鍾意第二個既，我諗觀眾同Giselle一樣都係咁驚訝。當然，雖然佢地係literally兩個世界既人，但都可以因緣際會係埋一齊，都係一個fairy tale come true既。

Ｄ歌好好聽，而且同故事推進有好大關係，用Giselle唱歌黎表現佢童話既一面，當佢愈來愈接近真人，佢就無再無啦啦唱歌，呢種「童話不敵現實」，又係睇到我有D心UP...

其實Enchanted我唔會話佢「好過Hairspray」，但一定係「As Good As Hairspray」，可能因為之前已經好期待，未出發先興奮令我覺得佢好睇左，但亦可以話我咁期待佢都無令我失望，好野。其實仲有好多好多想寫，不過都係分幾次啦..天光啦又...

另外完場既Credits都好靚，好好睇，應該睇埋先好走!!!!

I am Enchanted!!!

我諗我今次真係中左毒
Enchanted Official Site入面既Trailers, Clips, TV Spots, Music Videos 同Making Of已經比我睇到爛(真係睇到個網hang左幾次)，Hairspray係睇完超興奮，Enchanted係未睇已經好興奮，仲有3日就可以睇啦...簡直係黎加拿大其中一個最大既意外驚喜~!!!!!!好期待!不過唔知點解佢唔係o係Downtown既戲院上，全部都係好遠既戲院...不過係阻唔到我去睇既!!!

剛剛係youtube又發現左幾個Clips，好短，但每段都好好睇~!!!D歌都好好聽，開頭覺得一般，但我依家係不斷開住youtube 聽完又聽，我仲幫佢地寫埋中文詞，我諗我真係上腦。其實我咁做都唔係完全因為無聊的，細個既時候睇Dinsey係聽中文版既，雖然之後都會睇英文版，但當時得六七歲，字幕都追唔切，所以配音版對我黎講係好重要的。係大個左要求原汁原味先會想睇原音版，我以前睇明珠930都係睇配音的。直到近來我都會耐唔耐睇下CD Booklet入面D歌詞係寫乜，有時齋聽根本聽唔到D詞，配音版既詞係好不錯的，譯到原意之餘亦都配合到畫面仲要ARM音，我直情係嘖嘖稱奇，最經典係Beauty and the Beast ''Belle'一曲，入面有一句''I need six eggs!''It's too expensive!'，譯左做「我想買蛋!!」，「實貴得嚇人」，都係耐不耐都會係我腦入面忽然閃過既一句神秘歌詞。我覺得Enchanted一定會好好睇 (我係有偏心，不過客觀黎睇都會好好睇!!!!!!)，但因為佢唔係成套都係animation，我諗佢唔會有配音版了，有D可惜...始終覺得要有中英文Soundtrack既先係Disney Classics(所以雖然Finding Nemo 同Incredibles係好好好好睇，但唔係Musical 對我黎講都係爭D...)，總之呢，貪過癮同情意結雙管齊下，造就左下面呢隻作品，同埋實在太耐無譯過野啦，手痕...有興趣可以去youtube 或者Offcial Site度聽下同睇下首詞，無興趣既就記得新年去戲院睇支持下Enchanted啦，一家大細睇又得，拍拖睇又得，同Friend睇又得，7A睇又得(家盈你一定鍾意睇)，真係名副其實Moive Event of the Year~!!!

Official Site: http://disney.go.com/disneypictures/enchanted/
Click Video-->Music Videos，就睇到Happy Working Song 啦~去youtube search都好易搵到~
由於搵唔到英文歌詞，好多都係估同問人的，大意係咁上下，如果大家聽到D英文詞係乜麻煩話我知~



The Happy Working Song



Come my little friends
let us all sing a little happy working song
Merry little voices clear and strong
Come and roll your sleeves up
so to speak and pitch in
we need product in the kitchen
as we sing along

To valitery too in the tub as we scrub a stubborn mildew stain
pluck a hairball from the shower drain
to that gay refrain
of a happy working song

We'll keep singing without fail
otherwise we'll spoil it
Hosing down the garbage pale
and scrubbing up the toilet bowl

How we all enjoy letting loose with a little da di dum dum dum
While we're emptying the vacuum hum
It's such fun to hum
A happy working song
Um um
A happy working song

Oh, how strange a place to be
Til Edward comes for me
My heart is sighing
Still, as long as I am here
I guess a new experience could be worth trying
Hey, keep drying

You can do a lot
When you got such a happy working tune to hum
While you're spooning up the soapy scum
We adore each filthy chore that we determine
So friends even though you're burning
we are happy working lot

Singing as we fetch the detergent box
Or the smelling shirt and the stinky socks
Sing along
If you cannot sing then hum along
As we're finishing our happy working song

Ah, wasn't this fun?


愉快工作歌

來吧共我高唱愉快工作歌
跟我來齊聲唱
細小聲音快樂而鏗鏘
發揮每點力氣
別看輕你自己
讓我共你步進廚房
繼續這遊戲

長期留在廁所的鏽漬
多固執都會被你洗去
助我清走那毛球積水
副歌似心情
明媚歡欣太高興

暢快歌聲不減弱
全因心意盡傾
沖洗一刻可想像
坐廁亦能閃令令

齊來合唱這闕愉快工作歌
啦啦啦隨心唱
這麼光彩潔白快鼓掌
唱出這感人
愉快工作歌韻
啦 啦
愉快奇妙樂韻

多 奇詭新鮮領土
王子偏卻未到
我心情難好
但 難得身於遠方
全新的體驗似流浪
一於向前闖

你 抹得好

乘著樂韻
一切事半功倍多麼快樂
齊聲唱
抹去污跡潔白無苦惱
有多頑固「LAI TAT」
亦永不被難倒
就算煩躁體力難補
亦有歌謠的懷抱

全部亦會光潔不沾泥塵
無論舊襯衫或染污白襪
齊歌唱
若你不懂唱亦能歡暢
就算艱辛也別遺忘全力唱

呀，真係好開心呀。

魔法奇緣

好興奮好興奮好興奮~~~~~~~~~~!!!!!!!!!!!
Enchanted有譯名啦~~~~~~~~~~~~~~~~~~~~~

叫《魔法奇緣》....唔....有點求奇...不過OK 啦...
(我有個習慣，就係知道一套新戲面世時會諗下佢個中文名會係乜
而通常我都諗唔到一個好名的...一係完全係IDEA,一係直譯...
我記得既有Eternal Sunshine of the Spotless Mind《無痛失戀》
我直譯係《無瑕心靈的永恆陽光》(or something like that)...
我真係估唔到佢會整個《無痛失戀》比我...
而ENCHANGTED就係諗唔到名既其中一套願
所以《魔法奇緣》我已經好滿意了)

多謝BEN send 條link比我~~~~
http://hkheadline.com/ent/movie_info.asp?srctype=m&contid=472

熟我既朋友都知道我係好鍾意Disney Princess系列的
即係所有Fairy Tales, 有公主王子巫婆邪不能勝正大團圓結局歌舞連場嗰種
而Disney 已經好耐無出過Fairy Tales 啦...我餓左好耐...
我本來已經放棄左，我以為以後都只係會有電腦動畫...同埋唔會再有Fairy Tale 啦...鳴...
細個時我諗過寫信比Disney叫佢地繼續出fairy tales...=_='''
我仲諗埋有乜故事可以用，長髮姑娘啦(遲D有得睇啦~!!!!!!)，天鵝公主啦，十二個跳舞的公主啦...等等等等...所以知道有Enchanted呢套結合真人同動畫既電影時已經覺得開正我嗰瓣，好期待
睇埋個Trailer 同behind the scenes我更加係超級期待，佢唔知係FAIRY TALE仲要有埋經典disney fairy tale 既經典場面同元素~~~~~~我暈了

即係好似你細個時好恨嗰個超合金有復刻版咁
好似多啦A夢忽然變返做叮噹咁，
你最愛嗰個初戀情人失驚無神借屍還魂同你再次蜜運
好感動 (我寫到有D想喊...HELP)
好好好好好興奮呀~!!!!!!!!!!!!!!!!!!!!!!!!!!!死啦我覺得自己high到好似隊左草咁....

同埋同埋
另一大令人超期待原因
就係電影配樂由Alan Menken負責~!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
Beauty and the Beast(One of my ALL TIME favourites!!!!!!!), Aladdin 同Little Mermaid既音樂都係出自佢手筆~!!!!!!!!!!!!!!佢亦係Broadway既作曲家，呢三套真係真係好好好好睇，故事感人，畫功細膩，D歌超好聽...
講開Alan Menken 好可惜既係佢既好拍擋，填詞人Howard Ashman(Beauty and the Beast, Little Mermaid, Aladdin)已經因為AIDS過左身...我覺得無左佢既Disney歌總係爭左D...(不過我最近先發現原來Aladdin已經係有另一詞人Tim Rice合寫...)
真係天妒英才...佢既詞真係好好...而我咁記得佢其中一個原因係因為喺Beauty and the Beast Soundtrack Booklet入面寫左一句extermely beautifully written既說話，我唔係好記得開頭，大致係咁的:

To our dearest friend, who gave a Mermaid her legs and a Beast his soul

我溶了...
文字的力量...

真係真係好鍾意呢幾套電影同Soundtrack...除左Little Mermaid無中文版之外，我係有齊呢三套既中英文soundtrack的...我都唔知點解當時屋企人咁捨得...百幾蚊隻CD都捨得買，仲要又中又英咁買...環境又唔係好...百幾蚊當時黎講好犀利了....講緊既係1990、1991年左右...我得六歲...其實我諗其中一個原因係...我阿媽自己都好鍾意...我記得Little Mermaid 我係有日無啦啦同媽咪講不如睇下有無得租(LD...)，點知真係有，當時我唔知Disney有呢套動畫，純粹想睇呢個故事...之後香港上時(嗰隻LD係英文無宗字幕的...有我都唔識睇...所以唔係好知發生乜事，淨係覺得好睇...)我記得喺娛樂新聞眼見到有片段睇...Beauty and the Beast同 Aladdin都係喺戲院睇，Aladdin睇左兩次(細個好興Disney睇多過一次，我連唔係咁BUY既Lion King 同Heculas都去戲院睇左兩次)，我阿爸睇到瞓左...一定係做野太辛苦...總之...Disney真係陪伴我成長，我同Disney亦係好有緣的~我第一套有記憶睇既戲就係Cinderella了...我身體裝著誰人兩歲半已定型了。

我發覺Little Mermaid， Beauty and the Beast同 Aladdin都係好Musical的...之前都無留意...可能同Alan Menken係Broadway Songwriter有關...唔怪之得我咁鍾意Hairspray啦...原來我係鍾意Musical的...我一路覺得自己最鍾意既係Horror同 Romantic Comedy...難得今次Disney回歸基本再做有Musical元素既戲，希望佢生生性性大賣啦...童話還童話...票房好的話先有再Encore fairy tale/musical的可能，加油呀~!!!我信魔法會有效的~!

講返Enchanted, 雖然各方面都好好，好令人滿意，但其實我係覺得有D可以挑剔既地方的，就讓我雞蛋裡挑一下骨頭。首先係2D部份既動畫...個Princess Giselle...好唔Disney Princess...佢個身型比例好怪...瘦到走樣到好似冒牌公主咁...好唔Disney...同埋個名...Giselle...好唔公主名...好唔識點講...只係感覺...太現代啦...同埋如果大家有睇條Link 個有字幕既Trailer...唔該...邊個譯架...芝茜!???????????????
可唔可以改個無咁似粗口既名呀...我知有童心既小朋友(同大人)唔應該好GOD咁用諧音解讀...不過...唔係咁好啦...唉...估唔到我已經去到「諗衰野」既地埗...我都唔係純情小生了...同埋Grumpy應該係「愛生氣」呀~!!!唔係「嬲爆爆」~!!!!係Snow White入面其中一個小矮人既名...我個年代仲係叫「愛生氣」既...我都唔知依家個官方名係乜...我都知譯字幕要就住畫面時間同耍表達嗰下comic effect，不過我覺得「愛生氣」都有呢個效果呀...不過唔可以單憑trailer就話佢譯得唔好，始終trailer個上文下理無咁清晰，希望套戲個字幕會「忠於原著」D啦...不過除此之外段trailer其實譯得好唔錯，同埋下面段故事簡介Giselle譯做芝莎，好好多...段簡介都寫得好好，好得意~

唔知佢到時D歌詞會譯成點呢...Aladdin同 Beauty and the Beast既中文版歌詞都係好好架，唱到，跟到畫面，同英文意思極大致上一致，簡直係不可多得既代表作~!!!!!
好期待呀~~~美國11月21上，香港08年2月新件檔先做，希望可以喺加拿大睇左先啦~
應該會好好睇既，返到香港再睇多次有字幕既~!!!!YEAHHHHHHH

生性呀...希望第日可以同情人一齊去戲院睇Disney Fairy Tales~~!!!我好有信心Enchanted會有好好既Reviews架~!!!!我黎左加拿大之後喺戲院都睇左幾次Trailer，D觀眾都好好反應~特別係Giselle比人叫佢唔好唱歌..同埋隻松鼠個可憐樣成場女觀眾即刻「OH~~~~~」....超期待之作，大家有興趣的話記住新年去戲院支持下~!!!!

給十年後的我

我:

好耐之前就想寫了，好似係年頭回歸十年，大家都寫了十年點滴﹔還是聽到薜X琪的「給十年後的我」...應該是後者啦...從來都是政治性冷感(非歐化句)，WYMAN對我的影響一定比回歸十年大。之後又見有報導話可以真係寫封信叫郵遞公司十年後寄比你，定還是網頁呢...唔記得了...22歲就咁無記性，32的你還好嗎?你記得你的十八廿二係點過嘛? 我依家係加拿大exchange緊，想寫，因為今日同朋友講開，原來出年(2個月後)2008了，我一直只當新一年是「一月」，我無諗過係2008年。好大個了。又因為看了一個寫了十年前後的網誌，又勾起我條筋(唔係根)，對，22的你就係咁無聊架啦，都仲係好血氣方剛的，32的你應該還有心有力，hopefully50歲前你還要有sextivity的，請好好調理身體，及調理他人身體。希望三張的你還有閒情逸緻講無聊笑話及有人陪你witty對話，自問自答不是太好笑。

蘇3，我最想知關於十年後自己的事，當然是感情事了。你知啦，我咁少女，就算十年後的你都不過是個中女，離熟女還未有耐。你身邊有個人未呀?你同佢仲有聯絡嗎?廿二的你從year 1暑假開始鍾意左一個人，到year4都仲係好鍾意好鍾意，你每晚臨瞓都仲係諗住佢，你覺得，這是愛了。但係佢唔鍾意你呀。你可唔可以話我知你到幾多歲先無再掛佢掛到傻呀，你可唔可以話我知你幾時先搵到個好鍾意好鍾意既人呀...你可唔可以話我知你之後遇到既人之中，有無一個係可以令你咁死心塌地咁義無反顧架?廿二的你覺得自己無可能搵到個咁鍾意既人啦...你睇到既時候係會覺得當日既自己傻仔，定係慨嘆自己咁有先見之明? 你拍過幾多次拖分過幾多次手? 你同佢仲有聯絡嗎...?希望你有...我知你睇到呢度一定會好掛住佢架...你身邊那個人(如果有的話)，你愛佢嘛? 你係想同佢一齊，還是只想有個人喺自己身邊? 廿二既你係鍾意佢個人，唔係鍾意拍拖既感覺...你的堅持原則還健在嗎?你還烈女嗎?你會唔會做過好多令自己後悔既決定? 廿二的你覺得，每個決定都係當時你覺得最好最有理由既選擇，廿二的你不後悔。你同自己講，要move on，要做個好朋友，要同佢keep到做好朋友，因為你想三四十歲既時候仲可以做佢既好朋友，可以得閒飲茶食飯吹水甚至double date，可以做佢仔女既favourite uncle...你記得自己講過咁樣對佢係最好的嗎? 你想佢幸福快樂無風無浪。你還是喜歡愛人多於被愛嗎? 我知你睇返會覺得，再離過既日子，你都過左啦，回望總係容易過實戰，我唔係想勾起你的傷心事，我係想話你知，你廿二歲已經搵到個令你有過「不枉此生」感覺的人，唔好覺得上天對你唔公平，其實係公平架，你難搵到情人，所以一黎就整個咁好既比你。友情從來都比愛情長壽，你知格。

朋友才可以幻想十年後聚會一齊八一齊玩一齊SEX AND THE CITY。

到時大家都真係SEX AND THE CITY既年紀了。也應該個個都有更多實戰經驗了吧。千祈唔好變了Charlotte，好悶的。朋友方面我倒是不太擔心，大家都係有心keep，一定會友誼萬歲的。我有7A，有GAP，有happy family, 有TRA MATES, 有莊員，有仔女，仲有好多好多女好開心識到佢地既好朋友。都說上天是公平的，因為你係你，先識到佢地。我相信三十幾的你地仍然係好好感情，仍然會互相支持，仍然會講低能笑話，面對既野可能唔同左，經歷可能多左，但係大家都係一樣的。我們都要健康快樂。你們都要。你們都會去唱k，會唱半成年，會唱懷舊金曲(即係今日既hit歌)。你們都會點勁歌金曲最後唱，唔好蝕比佢。廿二的你，覺得這班朋友都令你有不枉此生的驕傲，三十二的你可以話比四十二的你聽。

還有你的屋企人。你有無乖仔有無生性照顧父母細佬?你有無同媽咪食TEA? 你繼承父業定係自己打緊工?你也很愛他們的。希望三十的你仍然和父母關係良好。要錫多D屋企人呀。有無帶另一半比爸爸媽咪過目呀? 我希望你可以。JOJO點呀...?我好擔心佢，希望佢生生性性啦。最好佢成左家立埋室啦，咁我唔駛煩...唔係喎...佢得29歲，仲好後生啫...睇定D好。

同埋我想問...你做緊乜工? 最好你話我知你中左六合彩，淨收息都夠下半世唔駛憂，你係咁倚投資下又賺左，於是成立幾個慈善基金回饋下社會，開左間CAFE平時同班friends hea(你仲知hea係乜架可)。 不過我都知唔會架啦，等我提下你未比社會殘酷現實責成一塊餅前你想做乜啦。你細個想過做既有: 畫家，漫畫家，插畫師，作家，設計師，律師(一號皇庭影響呀唔該)，偵探(...=_=你覺得好型)，演員，歌手，明星，歌星(同演員歌手唔同的)，記者，廣告，影評，主持，主播，新聞報導，到你開始向現實低頭，覺得以上種種都搵唔到食，自己又無料到做唔到，你就開始退一步，理想現實中間踩鋼線，想做電影字幕翻譯啦，雖然都係未必搵到食...不過起碼後生既你係覺得...你係真係鍾意同肯做既...你唔好放棄呀下我話你知，你起碼要send過CV比TVB同各大電影公司呀下...唔得都叫試過呀下。

差D唔記得，希望你三十幾都唔好中年發福啦，有錢財身材買衫襯衫，有頭髮整頭(你有無試過爆炸頭啫），大吉利是開始甩就好skin head佢啦知嘛。同埋希望你仲得閒睇下戲呀電視呀聽下歌咁啦...你依家最愛既電影都仲係Titanic, Brokeback Mountain同 Hairspray，你一路寫一路聽Hairspray張soundtrack聽緊第3次...成3粒鐘啦...不過你好享受寫野。你鍾意wyman, 追緊desperate housewives, ugly betty, heroes同prison break仲有gossip girl, all time favorite係friends, sex and the city, dark angel同felicity。唔好唔記得呀，我閒搵返套complete series出黎睇啦...希望你有買啦。

打左好耐，唔講啦，你自己保重，得閒又寫比呀42歲蘇甘霖啦。

祝: 幸福快樂

廿二歲仍然青春無敵的你

2007年10月28日
13:48


p.s.雖然有起有落，你的生活還是樂的多，有喜有樂，要記住呀。love you>3<

Disney Sequels

星期一交paper...hea住咁睇readings,之後忍唔住去左睇youtube同imdb
睇下又link下睇左4個幾鍾...
份paper未開始...不過頭先的起心肝jot 左d notes
應該夠聽日寫...聽日先算...



不過好開心呀~~~~話說呢排唔知做乜好鍾意去youtube睇disney d 歌...睇返好多阿拉丁既CLIPS...
睇睇下又會睇下D related videos,今日仲睇埋wikipedia同imdb既相關info
因為睇到有little mermaid III....之前II我都未睇...
近年disney好興整d sequels比d disney classics...我都睇左唔少
據聞因為有利可圖，所以disney keep住拍
不過因為唔係for戲院上，d畫功係無咁好的...好多時都有走樣既問題...
little mermaid 3都好似走樣走得幾犀利...Cinderella II畫得好似原裝...不過故事鬆散...
Cinderella III故仔ok,不過畫得無咁似...其實好多人都幾反對DISNEY拍sequels
覺得會沾污原著...因為sequels一定無咁好 (公平D講sequels資源係少好多既)
不過我又覺得ok...因為我會當佢地係獨立故事睇...
D Classic係完左就完左，我唔會覺得sequels會沾污佢地既...
係多個Fantasy多個fairy tale je, 唔鍾意可以唔睇當無事發生過
不過有時D畫功真係幾令人失望...(BTW pocahotas2 係出乎意料地好睇)

其實我睇到咁遠係因為...就黎有一套真人加動畫既DISNEY MUSICAL~'' Enchanted''
熱烈期待中...不過我希望佢地唔好將個主角列入disney princess呀...
我覺得佢都唔似Disney princess既...佢似扮dinsey 既princess...

其實我係鍾意有人既disney animation, 所以特別鍾意princess系列...
加上佢地好多都係musical style...不過近來disney focus係3d...
我已經餓左2d/princess/fairy tale好耐...好期待enchanted...
不過更開心既係~~~~原來disney會拍rapunzel~!!!!!!!即係長髮姑娘~!!!!
I like this story ar!!!!!!!終於有另一個fairy tale la...
另外仲有一套the frog princess...不過同青蛙王子無關...
係2d...不過好似係講20年代的...我都係對once upon a time既故仔有興趣d...
disney既fairy tales簡直係陪伴我成長...好期待ar~!!!!!!
原來我都仲係好鍾意disney的...haha...
希望快d有得睇la...好耐無去戲院睇fairy tale既disney la....對上一套...
好似係花木蘭...我好似去戲院睇左3次...我覺得係近年比較好睇既DISNEY 2D...
對上一套睇既DISNEY 3D應該係incredibles lu...
好期待~~~~~!!!!!!!!好似09年先有得睇...
好期待~~~~~

好野我又打左成篇同加拿大生活無關既ENTRY...又無做PAPER...
仲要天光啦...=_='''



另一樣開心係...當我jot完notes好暈諗住瞓...你就出現了...

光榮之家

我的家很擠迫迫得差點我也放不下。



剛剛執天台，想要甩掉不要的東西。翻箱倒「籠」，翻出了很多很多東西，包括許多真正80s真正復古真正retro的七八十年代衫褲，爸爸媽媽細佬還有我的都有，原來當年女裝cutting都很闊,我找到一件粉紅polo(當然沒有錢買ralph lauren，我現在都不捨得買)，洗洗後我應該穿得上，修身剪裁似乎是80年代後的事。另外找到了一件檸檬黃的polo(giodano的), 應該是爸爸當年的衣服，印象中爸穿的都是黑灰杏色，暗姣也未試過，如此鮮色的少見，洗乾淨應該起碼可以在家中穿。

衣物中還有很多件好像是裙但其實是上衣的東西，膊頭位都很橫，又有一些近幾年都時興過的衣飾，legging，現在興，工人褲也是早前還有很多妹妹仔穿的，又有好些很長的衫裙，我都不知我媽甚麼時候長這麼高過。又有許多很細件頭腰圍很細的短裙，我覺得只有20吋，比盡，24吋吧，都是媽年輕時的衣裝，一句句「原來喺度」，「我著住件衫抱住你影嗰幅相仲喺度」，然後是「...都係比人啦」，「回收啦」，其實我知道她很不捨得，但天台要拆，沒辦法，東西總要找個歸宿。那些都是青春都是回憶，我都明白。衣服我也許不太有記憶，除了某些我小時候常穿的翻版卡通燙畫tee(有龍貓snoopy 叮噹白雪公主)，其他我都不太記得，那些細細件的bb衫，我覺得似比公仔著的多些(其實真係幾得意的，原來我曾經咁細粒，我都keep左幾套)，我本著尋寶心情又找到了一件爸後生時的外套，好似好暖，我打算去加拿大時著，仲好似好型，件衫唔型的話，我覺得件事已經夠型。

這件有紀念價值，那件不捨得掉，這件洗下可以在家穿......執執執幾小時下來可以甩的其實不多，我很明白媽不捨得的感覺，除了回憶，還有很多一去不復返的「青春無敵」，我很記得媽媽說過，「以前有身材就無錢買衫，依家叫捨得買，又無身材著」。不知是不是這原因，我發覺原來我從小就有很多很多衫......原來「好多衫」不是今天才發生的事。當然當中很大部份是表哥們穿過的舊衣，爸爸當年駕小巴，併命做都是剛剛好吧，都不會有很多餘錢買衫，而小朋友大得快，買得多也實在不環保，不過買下買下又有親戚比下比下，都有很多就是了。也許就是得來不易，每件衫都天令人記得它的來歷，穿著時發生過的事，應該不會有今天的「買左都唔記得」的情況。其實我很像媽媽，我也是keep多過甩的。留戀的從來不是物件，是背後的紀念，有一刻很明白保衛皇后碼頭人士的心情，也許當天跟他們在碼頭看日落的人都嫁了別人了，都不在了，都去會曾灶財去會英瑪煲曼了，有的只剩碼頭，林夕說，「原來悼念竟倚賴眼睛」，是真的，沒有了實物我們不知把回憶放到哪裡去，漸漸地那些朝思暮想那些依依不捨，都不知飄到哪兒去了。我知總有一天，我會放得低你。我知我知，我知。但我像媽媽，我懷舊，我不捨，放不低，都是基因的錯。我從來都像我媽媽，或者是像女人，想太多，易感傷，婆媽，這樣說來可能有點像王貽興。但這都是我，我也改不了。還很長氣。有感情依附的，或是這些回憶的棲身之所，我不捨得放，wyman說，「原諒我懷舊」。

執拾過程中又發現很多書簿，有筆跡的作文呀free writing呀我最不捨得甩，部份還畫了圖，又找回很多無聊時畫的畫，從詞語簿（小學時是叫詞語簿的）又發現了自己字體不同階段的變化，有扮工整正直四四方方的「蕭俊傑」體（他是小學同學），有之後扮靚扮秀麗的施韻體(她是自幼稚園的好朋友)，不知為什麼總要模仿別人寫字，覺得靚就學。那些作文，懶有頭有尾，懶抒情而且開頭要用倒敘法，很叫人毛管戙，很stephy，很小學生，但都是我，7下7下，有時回想都覺得自己當時很白痴很老土(更恐怖是覺得現在仍然如此)，但我知道在可能範圍內我都做到最好了。有時覺得自己很次貨，而某人不喜歡我也實在是情有可原，其實真的無須如此悲情，甚至不用悲憤地自我慛眠認為你不識貨，我大把人要，實情是，路直路彎，道不同不相為謀而已，有個迥旋處讓我會一會你，我有賺了，或是，你有賺，好，winwin。

2007年8月11日

十分喜歡一個人時做的傻事 (一)

1.將佢寫o既xanga由近到遠睇一次，睇到尾(即係佢寫o既第一篇)為止
2.臨訓前掛住佢
3.訓緊夢見佢
4.訓醒想見佢
5.聽sweet情歌諗起同佢o既sweet o野
6.聽慘情歌諗起同佢o既傷心事
7.聽佢鍾意o既歌手，諗起佢
8.聽佢鍾意o既歌種，諗起佢
9.聽佢唔鍾意o既歌種，諗起佢(跟手熄o左佢/轉台) (除非係令你諗起佢o既sweet/慘情歌)
10.覺得同佢一齊o既戲特別好睇，食o既o野特別好食，白痴無聊o野特別sweet
11.覺得佢o既側面係全世界最靚o既，佢個嘴打側睇係心型o既，
而佢唔可以見到自己側面係一大遺憾
12.同理，訓覺個樣都係
13.唔會delete佢send比你o既sms/msn history/email，
就算係'where r u?' 'lesson' 之類，都唔捨得delete
14.將msn/icq history copy落xanga private post
15.對佢鍾意o既o野(衣食住行都係)特別敏感，佢鍾意o既國家，飲品，小習慣等等
16.覺得佢一切唔好o既o野，都唔係唔好o既
17.佢鍾意飲咖啡，你會一路叫佢唔好飲o甘多，咖啡因對身體唔好，
一路見到百佳做特價買定比佢跟手幫佢雪埋，等佢唔駛忽然想飲無得飲
或者突登落街比錢'gum'機
18.佢無手尾，係率性o既表現，d o野周圍放，係free spirited
佢搵唔到要搵o既o野，你會一路話佢一路幫手搵，如果快過佢搵到，
會一副「都叫你有d手尾ga la」o既衰樣，實際上個心係好甜o既
19.無論份assignment幾趕，都有時間同佢講兩嘴，嗲下佢，把口話好多o野做，但係個身唔肯走20.成日驚佢有乜冬瓜豆腐(touchwood)，寧願自己有事，又驚佢會傷心，更驚佢唔傷心
21.想佢好多過想自己好
22.驚有狂蜂浪蝶埋佢身，佢講，你呷醋，佢唔講，你驚
23.如果自己有狂蜂浪蝶，即刻話佢聽，想佢呷醋，而佢通常都懶懶閒
24.你會想將你同佢所有sweet o野都記低，甚至寫篇xanga，然後發覺跟本寫唔o西

仲有太多，得閒寫過
想寫低，因為覺得，可能以後都唔可能o甘愛一個人嘞
可能會遇到更愛更夾更開心
但第一次o既震撼開o左樽就走o左氣
無o左氣o既汽水，只係一pat甜爺爺o既糖漿
之前聽人講，話預o左第日結婚o個個唔係最鍾意o個個
覺得好恐怖
但係愈大愈覺得好有可能
第日同你做人世o個個可能唔係你o既最愛
而你做o左同人過人世o個個，都可能唔係佢最愛
唔係話假，唔係屈就，可能係compromise
最真最盡o個次可能一開始就無o左
起跑去得太盡，之後根本無力再去
唯有o係exhaustion之中嘗試行去終點
如果唔係要自己一個'noun'去已經好好彩
我唔知想講乜shit